Ég hef ákveðið að gera n.k. MÁD verkefni (MÁD=Mynd Á Dag). Ég ætla að mynda og skrifa stutta línu um það sem ég er þakklát fyrir og verður á vegi mínum við hversdaglegar athafnir. Það er augljóslega til að minna sig á allt sem að maður hefur og nýtur í stað þess að einblína á það sem manni finnst manni “vanta”. En líka af því að ég hef fundið við fyrri MÁD verkefni að þau eru einstaklega lærdómsrík og gefandi. Ég ætla reyndar að gefa mér eitt ár til að klára 100 dagana, enda annasamur tími framundan. Í þetta sinn hef ég alveg opið hvernig stíllinn verður, en þetta á samt að vera frekar hraðsoðið.

Ég bæti myndunum við hér í póstinn smám saman, svona 10 myndir og svo nýjan póst.

Verkefnið er algerlega innblásið af endalaust hrífandi 365 daga “Grateful” verkefni Hailey Bartholomew. Ég mæli með að skoða það á vefsíðunni hennar, en þar segir hún frá því, birtir nokkrar blaðagreinar um það og linkar á myndirnar sjálfar. Hún tók sitt verkefni á Polaroid en ég verð að láta stafrænu tæknina duga þó hennar aðferð hafi óneitanlega verið meira sjarmerandi.

Fyrir tveimur árum tók ég þessar myndir af Eyjólfi Eyjólfssyni fyrir kynningarefni, ég hef alltaf haldið mikið upp á þessa myndatöku, þetta var í fyrsta sinn sem ég fann almennilega hvernig má nota Lensbaby linsu til að skapa sterka stemmningu. Kyrrðin og svo snjórinn sem lá yfir öllu eins og fínt hveiti skemmdi ekki fyrir. Ef þið þekkið ekki lensbaby linsurnar getið þið kynnt ykkur þær á heimasíðu þeirra hér og hérna er myndasett á flickr með fleiri myndum sem ég hef tekið á slíka linsu, nánar tiltekið Lensbaby 3G.

Annars hef ég verið að uppfæra vefsíðuna mína síðasta mánuðinn eins og sjá má. Ég bætti útlitið, breytti myndagalleríum og bætti við Sjoppu fítusi, en það má fara í hana hér hægra megin eða uppi í valmyndinni. Í sjoppunni er hægt að hala myndunum niður í mátulegum stærðum beint eftir að greiðsla hefur verið framkvæmd með paypal/greiðslukorti. Það má annars vegar kaupa leyfi fyrir myndir til ýmissrar notkunar, s.s. birtingar í dagblöð eða í auglýsingar og hins vegar gegn sanngjörnu verði hala þeim niður til persónulegra nota, t.d. til að nota sem skjá-veggfóður eða láta prenta fyrir sig mynd til einkanota/eða til gjafa. Ég mun svo einnig bæta við möguleikanum á að kaupa ákveðnar myndir / myndaraðir útprentaðar og númeraðar í takmörkuðu magni en er enn að kynna mér leiðir til þess.

Að fylla sjoppuna af myndum er langtímaverk og það sem komið er, er rétt byrjunin. Kominn er þó vísir að tveimur flokkum, landslagsmyndir frá Íslandi og börn að leik.

Gaman væri að fá viðbrögð við uppfærslunni, hvort sem er í athugasemd hér að neðan eða í einkapósti. Hvernig virkar síðan, er auðvelt að finna það sem leitað er að? Hvernig hlaðast síður / myndir inn? – Hægt / hratt?