Aldarblik er geisladiskur sem ég var að fá í hendurnar. Hann er gefinn út í tilefni af 100 ára afmæli Hafnarfjarðar, en hátíðarhöldin stóðu sem hæst núna um helgina eins og flestir vita. Það eru ungir hafnfirðingar sem flytja þar ástsæla íslenska söngva í nýjum útsetningum Jóns Guðmundssonar og Sigurðs Rúnars Jónssonar. Það eru þau Eyjólfur Eyjólfsson tenór, Ágúst Ólafsson barítón og Ástríður Alda Sigurðardóttir píanóleikari sem eru þar í aðalhlutverkum. Aðrir flytjendur eru Birgir Bragason á kontrabassa, Helga Björg Arnardóttir á klarinettu og Hjörleifur Valsson á fiðlu. Svo syngur kór Flensborgarskóla í nokkrum laganna undir stjórn Hrafnhildar Blomsterberg.

Ég hannaði allt útlit disksins og tók ljósmyndirnar. Gamlar ljósmyndir sem sýna mannlíf úr Hafnarfirði á síðustu öld eru úr einkasafni. Diskinum verður bráðlega dreift af 12Tónum, þangað til má nálgast hann í Hafnarborg.